بلد العجايب

فى فلم الاخر هانى سلامه فتحلى صدره على الاخر ومحدش همه و بيقول لامه نبيله عبيد " انا اخترت اكون مصرى " وانا مش فاهم هو كان ايه فى دماغه وقتها بس اللى ميعرفش يقول عدس .مقصدش طبعا ان مصر مش حلوه لاسمح الله لا خالص على فكره انا بحب مصر جدا وبحس بفخر اننا المصرين اكتر ناس فى الكون عندنا ارتباط وانتماء لبلدنا وفخور اكتر اننا فى مصر قدرنا نهدم القاعده العلميه المسلم بيها اللتى بتنص على انا من المستحيل تحقيق الشئ ونقيضه فى نفس الوقت ...هتقولولى ازاى؟

هقولكوا ادينا مثلا اهه فى بدايه الدراسه وفى فى الدراسه فى بلدنا

• متستغربش لما تلاقى وزاره بتقول احنا بنحارب الدروس الخصوصيه وفى نفس الوقت هتلاقى وزاره تانيه بتاخد ضرايب من المدرسين اللى بيدوا دروس خصوصيه طيب منين بنحاربها ومنين بندي للدروس شرعيه لما بناخد عليها ضرايب
  

• متستغربش لما تلاقى اغلب طلاب مصر بيقدموا كليات عسكريه بعد الثانوى ولو سالتهم عن السبب يقولولك عشان نخدم بلدنا وهما هما دول اللى بيعملوا المستحيل عشان ميدخلوش الجيش بعد كده

• متستغربش لما تلاقى مفتى البلد يفتى بجواز اجراء عمليات ترقيع غشاء البكاره لاى سبب كان وخدنلى بالكوا انتوا من لاى سبب كان دى وفى نفس الوقت فى جامعه الازهر وخدنلى بالكوا برده من الازهر ده فى كليه الشريعه والقانون بيدرسوا للطلبه غير كده وانها تجوز "بس مش لاى سبب كان "

• ومتستغربش ابدا ولا تحس ان فى حد بيستعبطك لما تلاقى الرقابه فى القنوات المصريه بتحذف كلمات زي "يابن الكلب " او يا ابن اللى مش نضيفه " ان جاز المجاز وفى نفس الوقت تلاقى نفس الرقابه على نفس القناة سايبين عادى مشاعد البوس والعرى عادى خالص ومتبقاش عارف بقى هما الناس بتوع الرقابه دول من عالم تانى ولاقالعين دماغهم ولابيستعبطونا ولا ايه؟

• حتى المنتخب الوطنى بتاعنا ممكن يغلب ايطاليا ويتعادل مع زامبيا
• النادى الاهلى يغلب ريال مدريد ويتغلب من غزل السويس
• النادى الزمالك هو الوحيد اللى ثابت على موقفه وبيتغلب على طول

اكتر حاجه ضحكتنى لما سمعت انه من الوارد فى الشتاء فى حاله انتشار وباء انفلونزا الخنازير ان المحاضرات تتلغى وتبقى عبر النت او التليفزيون يا سلاااااااام

• يعنى ممكن تلاقى طالب طالع على سطوح بيتهم ابوه يقوله بتعمل ايه؟ يوقله بعدل الاريال يا ابا عشان اللحق المحاضره الاولى

• او تلاقى طالب يقول للدكتور معلش اصل النت كان قاطع ولو طالب خبيس شويه يعمل net cut على صحابه عشان يطلع الاول وسعتها هنسال هل يجوز wire less ولا خارج عن المنهج ,
• طيب افرض الكهربا عندى قطعت اعمل ايه ولو فى حاجه فى المحاضره مش فهمها استفسر ازاى منا لو رفعت ايدى شهر محدش هيشوفنى ولا وقتها ابقى ابعت اسالتى على ماسبيرو الدور التانى قسم الرياضيات

• طب المحاضرات فى التلفزيون هتبقى لاى جامعه واشمعنى جامعه دون عن التانيه ولاى كليه ولاى فرقه , طب والطالب اللى فى عشوئيات ولا معندوش نت ولا تلفزيون يعمل ايه؟ انا مش ضد الاحتياط ومواجه الازمه بس لازم ندرس الحل صح عشان يبقى فعال ويبقى اسمه حل مش اى منظره كدابه .

فى النهايه احب اقولكوا ان القاعده المستفاده فى الزمان ده فى مصر هى

انه يمكن تحقيق الشئ ونقيضه فى نفس الوقت فى مصر

مش بقولكوا احنا فى بلد العجايب

لكل واحد فاكر نفسه هياخد حق الله على الارض .....حمرة

لما باشوف العلاقعه بينى وبين اصحابى الاقباط ازاى هى فل الفل ولا انا فارق معايا انهم مش مسلمين ولا هم فارق معاهم انى مش قبطى والحياه اخر زبادى فى الخلاط
وعلى فكره مش بنعمل كده عشان الوحده الوطنيه والكلام الكبير ده لا عادى يعنى ده الطبيعى ده الاساس ,

وفى نفس الوقت الاقى طلبه مسلمين مايحبوش يصاحبوا اقباط وطلبه اقباط وخادين لهم جمب لوحدهم ودى حاجه مشهوره فى كل جامعه فى مصر بستغرب طيب ايه الفرق؟ ايه اللى وصل الناس دى لكده؟

بس لما لقيت ان فى ناس كتير كل واحد منهم عامل نفسه المدافع عن دينه
واللى خلاص هياخد حق الله على الارض وتلاقيهم طول وقتهم بيسترزقوا من ورا الكلام عن المشاكل بين المسلمين والاقباط واللى يقولك الاقباط مضطهدين واللى يقولك المسلمين مظلومين والاقباط صحيح هما شويه صغيرين بس وخدين كل الثروه بتاعه مصر مش عارف ليه العالم دى واحد فيهم فاكر نفسه شيخ الاسلام ولا القديس مرقص على النعمه ما حد فيهم ليه علاقه بالدين ولافاهم حاجه فيه ,

ولما حولت اوصل لاساس التعصب والتطرف فى اى دين ملقتش اى صله بين الدين وبين التطرف

فى الاسلام بنقول بسم الله الرحمن الرحيم (وَلاَ تُجَادِلُوا أَهْلَ الْكِتَابِ إِلاَّ بِالَّتِي هِيَ أَحْسَنُ )

و بنقول بسم الله الرحمن الرحيم ( ادفع بالتي هي أحسن فإذا الذي بينك وبينه عداوة كأنه ولي حميم )


والمسيحيه بتقول لقد قيل لكم من قبل أن السنّ بالسنّ والأنف بالأنف، وأنا أقول لكم: لا تقاوموا الشرّ بالشرّ بل من ضرب خدّك الأيمن فحوّل إليه الخد الأيسر ومن أخذ رداءك فأعطه أزارك وإن سخّرك لتسير معه ميلاً فسر معه ميلين

فى الاسلام بنقول ان ربنا غفور ورحيم وفى المسحيه بيقولوا الله محبه

انتوا عارفين الاغرب من كده ان انا مثلا مسلم وشايف ان دينى هو الصح وانى انا اللى هدخل الجنه " وده حقى والا مكنتش ابقى مسلم " , والمسيحى شايف ان دينه هو الصح وهو اللى هيدخل الجنه " وده حقه والا مكنش هيبقى مسيحى" وتلاقى كل مسلم نفسه المسيحى يبقى مسلم والمسيحى لما يحس كده يزعل من المسلم
وفى نفس الوقت تلاقى كل مسيحى نفسه كل مسلم يبقى مسيحى والمسلم يزعل لما يحس بكده

طيب ما احنا لو ركزنا شويه هنلاقى ان كل واحد نيته سليمه وحابب الخير للتانى ونفسه التانى يدخل معاه الجنه يعنى والله الحب هو الاساس بس اوقات التطبيق الى مرجعيته التعصب هو اللى بيضيع الحاجه الحلوه دى

يعنى من الاخر لو واحد فاهم دينه صح وملتزم بيه وحسه بقلبه عمره ما هيبقى تعصب ولا حد هيقلق ويخاف من التانى ولا فئه هتاخد جمب من الفئه التانيه ولا حد هيرفض الاخر تانى ابدا اما شويه الغجر اللى بيكلموا عمال على بطال دول سيبنا منهم دول ارجوزات الحكايه بالنسبه لهم رزق وشغل وهيفضل المسلمين والمسحين فى مصر اخوات والحلوين التانين هيفضلوا طول عمرهم منبوزين وملهومش احترام

دى وجه نظرى فى الحكايه واللى مش عجبه خليها تكله

لو كتبت كتاب فى يوم من الايام هتبقى دى المقدمه بتاعته

لو كتبت كتاب فى يوم من الايام هتبقى دى المقدمه بتاعته

مقدمه لا بد منها

سبحان الذى سخر لنا هذا وما كنا له مقرنين وانا لله وانا اليه راجعون ,

الأخوة والأخوات اعضاء المجلس الموقر لقد استخرت ربى وقررت ان اكتب هذا الكتاب
الذى بين ايديكم "ويارب يكون بين ايديكم بجد و ميكونش فى حته تانيه " وعلى الله يعجبكم لان انتوا عندى كفايه انتوا نواب الشعب ,انتوا اهم من الشعب فلو قريتوا الكتاب بتاعى يعنى الشعب كله قراه وبعدين هويعنى الشعب فاضى يقرا مش لما ياكل الاول.... ما علينا المهم دلوقت يا حبايبى يا حلوين يا قاعدين على الكراسى مخللين نرجوا من سيادتكم ان يتفضل الموافق على هذا الكتاب برفع يده... موافقه

" يموتوا فى رفع اليد والموافقه "

" ملحوظه هذه ليست مقدمه الكتاب هذا الجزئ محلسه لابد منها اى كلام وخلاص واقطع دراعى لو حد منهم فاهم حاجه بس بيفرحوا قوى بكلمه نواب الشعب واعضاء المجلس الموقر فقولت اعملها بجميله وافرحهم "

مقدمه الكتاب

كان لازم اكتب الكتاب ده فى وقت البلد فيه ماشيه بقافاها وبرغم ان محدش فاضى يقرا بس كان لازم اكتب الكتاب ده انشاله حتى اخواتى بس اللى يقروه اهه اللى نلحقه احسن من اللى منلحقوش

اعزائى القراء قررت الا يمتلئ كتابى هذا بالتفاهات والايحائات الجنسيه القذره والالفاظ التى لا اتمنى ان يتعلمها ابنائى ولن اكتب ما يريده الناس قرائته بل سوف اكتب ما اريد ان تقراه الناس وقد قررت الا يكون عنوان هذا الكتاب
"ماذا تفعل ليله الدخله " عشان الكتاب يعدى ويتباع ولكن سوف اسميه " ماذا تفعل وقت الزنقه "

مش هخاف اخد فى سنانى لو تنحت منا برده لو نمت على بطنى هتقلش
وانا بقى لا هجيب عقد عمل واسافر الامارات ولا هدور على حاجه تجبلى اعفى من الجيش
انا خلاص قررت اقضيها بضينه على نفسى وعلى صحابى وعلى الحياه ويا صابت يا 80 مليون عمى.

محدش بينام من غير عشا ..الحلقه الاولى

اعزائى مشاهدى قناةما "الش"وقلتله نرجوا ان تكونوا استمتعتو باغنيه الدنيا خربانه المقدمه من محلات خضر العطار والان تستمعون لحلقة جديده من برنامج محدش بينام من غير عشا تقديم الاعلامى الفحل الاوسطى عبده فرش وضيفه فى هذه الحلقه السيد المسئول د / ابراهيم كله بامر الله......وفاصل ونبدا

عبده فريش

هذا البرنامج برعايه...... كوفى شوب الصحبه الكويسه ومحلات الحاج سلامه السيد للادوات المنزليه

عبده فرش : فى البدايه نحب نرحب بضيفنا المسئول ونقوله ازيك يا مسئول

كله بامر الله : ازيك يا خويا

عبده فرش : رمضان كريم

كله بامر الله : الله اكرم

عبده فرش: سيادة المسئول بعد ما اصبح فيروس انفلونزا الخنازير وباء عالمى نحب نعرف ايه استعدادتكم لمكافحه الفيروس

كله بامر الله : ياعم والله ولا عالمى ولا بتاع دي كلها اشاعات

عبده فرش : لا ياشيخ

كله بامر الله : ايوه والله انت عارف وباء ده لما تلاقى الناس بتموت بالميات زى ما حكتلى ماما على ايام الكوليرا وانت اعلامى كبير وعارف كل حاجه

عبده فرش : يا ساده المسئول هو ده كلامى انا دى الامم المتحده هى اللي قالت كده

كله بامر الله : هو حد بيسمع كلام الامم المتحده وبيفلح هى الامم دى بتفهم حاجه ؟!! وبعدين احنا وضعنا مختلف انا حضاره سبع تلاف سنه

عبده فرش : طاب يعنى لو افترضنا انه بقى وباء عالمي وموتنا بالميات زى ما الست مامتك قالتلك ايه العمل ؟ هل مثلا ممكن تفرضوا حظر تجول زى ما حصل فى المكسيك ؟

كله بامر الله : ايه ده هما عملوا كده فى المكسيك طاب والله فكره

عبده فرش : وهتجبولنا الاكل لحد البيت زيهم؟

كله بامر الله : قصدك ديليفرى يعنى وتدفعوا تمنه طاب والله برده فكره واهه بالمره نخلق فرص عمل جديده للشباب

عبده فرش : لا ديليفرى وندفع تمنه ايه ؟ هو احنا اصلا معانا فلوس للديليفرى واحنا بنشتغل لما هيبقى معانا واحنا قاعدين فى البيت انا اقصد تجبولنا الاكل ببلاش زي م انتو اللي هتفرضوا حظر تجول انتوا برده المسئولين عن اكلنا

كله بامر الله : قصدك يعنى نتكفل باكلكوا وانتوا قاعدين لالا دي اهانه للشعب المصرى وكلنا عارفين ان الايد البطاله نجسه ولايمكن نحط شعبنا فى الموقف المحرج ده واكرر مش الفيروس هو اللي هيحبسنا احنا اللي هنحبس الفيروس

عبده فرش : يا عم انت هتخطب ما تكلمنا كلام نفهمه

كله بامر الله : عايز ايه؟

عبده فرش : وانا هعوز منك ايه انا بس عايز اعرف لو شكيت فى حد انه مصاب اعمل ايه؟

كله بامر الله : هو ده الكلام وده بقى دورنا لو شكيت فى حد وديه المستشفى او اتصل على الخط الساخن بتاع الوزاره

عبده فرش : هو كام الرقم؟

كله بامر الله : مش فاكر متهيالى كان فيه صفر ده من كام يوم كان مكتوب فى القاهره اليوم طاب استنى اشفهولك فى الموبيل

عبده فرش : خلاص خلاص قاللونا فى الكنترول انه 105 بس فى ناس كتير اتصلت ومحدش رد او مجمعش اصلا

كله بامر الله : تلاقيهم بس اتصلوا بليل والناس نايمه ودى قله زوق او ممكن مجمعش عشان مدفعوش الفاتوره والحراره اتشالت وده اهم دليل علي انه لا فرق بين الشعب والحكومه امام الحكومه وان مصر وحده واحده

عبده فرش : لا فرق ايه ياعم ؟ اللي بتقوله ده كلام فارغ انا مالي ومال الكلام ده بقولك ايه عندك كلمه اخيره عايز تقولها عشان نخلص

كله بامر الله : يا جماعه الموضوع مايخوفش للدرجه دى وفى نفس الوقت متبتوش اوى كده فى الحياه واعلموا ان الاعمار بيدى الله وان لو اجتمعت الامه كلها على ان ينفعوك بشئ لن ينفعوك الا بشئ قد كتبه الله لك يعنى لاتقولولي ادويه ولا استعدادات ولا غيره دى حاجه بتاعه ربنا وكله بامر الله

عبده فرش : سيادة المسئول ايدك ابوسها

كله بامر الله : استغفر الله استغفر الله والتانيه كمان استتغفر الله استغفر الله

عبده فرش : والى اللقاء فى الحلقه القادمه من برنامجكم محدش بينام من غير عشا

جوابات صابره السيد عبد الصبور 3

بسم الله الرحمن الرحيم

السيد المحترم / رئيس جمهورية مصر العربيه

بعد التحيه ,

انا المواطن / الغلبان محمد الغلبان

اكتب اليك سيدى الرئيس وانا في كامل قواي العقليه لاقول لسيادتم انني على استعداد تام من الزواج من السيد البومه ام تقويم فى سنانها

صابره السيد عبد الصبور

سيدى الرئيس انا احمل دبلوم صنايع قسم كهربه سافرت الى السعوديه وانا عمرى 25 عشان اشتغل واحوش فلوس وابعتها لاخويافى البلد عشان يبنيلى بيت اجوز فيه وكل ما اكلمه يقولى ايوه يا غلبان كله تمام وانا رايح اجيب البلاط ومره رايح يجيب رمل ومره اسمنت

• قضيت فى السعوديه 7 سنين ولما رجعت بقوله فين البيت اللي بنيته تعالى ورهولى قالى ( بيت ايه يا روح امك هى الفلوس اللى انت بعتها دى تجيب بيوت ) وعرفت انه كان بيخدها يشترى بيها مخدرات من التاجر المعتمد فى قسم الشرطه عندنا فى البلد واللي كمان بيورد قضايا للباشا ظابط المباحث وفى فرح ابنه عزم المامور ورجالته عموما ما علينا اللهم لا حسد ويابخت من كان المامور خاله

• المهم يا ريس انا اتعصبت جامد سعتها وضربت اخويا على دماغه من غيظى بس والله ما كان قصدى اى حاجه وهو دلوقت بخير الحمد لله بس منهم لله ولاد الحرام يشهد عليا واتايدت شروع فى قتل واخدت فيها عشر سنين قضتهم فى السجن وانا راضى والله وعارف انى غلط ولازم ادفع تمن غلطى وقررت انى افتح صفحه جديده لما خرجت بس اللى لقيته لما خرجت مكنتش عامل حسابه

• يا سيدة الريس انا بقالى 3 سنين متراقب وكل يوم لازوم اروح امضى وامسح واسيق اسم الشرطه عندنا ولا عارف اشتغل ولا اعيش زى اى انسان غلط ودفع تمن غلطته ولما جيت اسافر اشتغل قالولى انت ممنوع من السفر وعرفت انى هفضل ممنوع لحد ما اقضى مده المراقبه وهو العمر لسه فيه خمس سنين يا ريس مع ان ده مش قانون يعنى

بس انا راضى زمتك يا سيادة الريس هو مثلا مثلا يعنى لو هشام طلعت مصطفى اتخفف الحكم عليه وقضى المده بتاعته مع العلم ان دى قضيه قتل قتل مش خناقه يعنى لما يطلع هيفضل متراقب وممنوع من السفر زيي كده

سيادة الريس الناس دى لابترحم ولا بتسيب رحمه ربنا تنزل انا خلاص بقى مش عايز اعيش فى البلد دى انا املى فى ربنا وفيك من بعده خليهم يسبونى بقى خلاص انا كرهت البلد وناسها اسف والله ياريس بس اصلى مشفتش فيها يوم عدل

ده ربينا بيغفر هما لا انا خلاص حاسس انى فى البلد دى مينفعش اكون غير مجرم

اسف انى شغلت سيادتك بس اصلى معرفش فى البلد غيرك

توقيع

المجرم / الغلبان محمد الغلبان

جوابات صابرة السيد عبد الصبور 2

بسم الله الرحمن الرحيم

السيد المحترم / رئيس جمهورية مصر العربية

بعد التحية ,

أنا المواطن / المصري راضى صابر حليم عبد الملك
احمل بكالوريوس تربيه عام قسم لغة انجليزيه بتقدير عام امتياز وقد تخرجت منذ ثلاثة عشر عاما قضيت ثلاثة أعوام منها مجند في الجيش
كضابط احتياط وذلك بعد ان حولت التهرب من أداء الخدمة ألعسكريه وذلك لان الحكاية مش ناقصة يعنى فقمت بقطع أول عقله من اصبعى السبابه في يدي اليسرى ولكن أثناء أداء الكشف الطبي تبين اننى لست شطلاوى فكتبلى الدكتور انى لائق وعندما طلبت انى اعمل التماس الدكتور قالي ( يابنى متحولش هي مكتوبالك أنت لابس لابس ) وبعد أن خلصت الجيش لم احصل على عمل لانى لم امتلك ألوسطه لكي أتعين كمدرس بالحصة في اي مدرسه

سيدي الرئيس ولأنى عاطل و ردا على الخطاب الذي وصلني من رئاسة الجمهورية والذي طلب فيه منى الزواج من البومه أسف قصدي
المواطنة/ صابرة السيد عبد الصبور فانا ابعث لسيادتك حتى أحيطك علما اننى غير موافق على هذه الزيجة لانى غير قادر على تحمل نفقات الزواج مع الوضع فى الاعتبار ان هذه المواطنه لاتملك شئ الا جزمه من النوع الكاوتشى وأكيد هتطلع حريمي ومقاسها صغير علي رجلي اللي برطشت وبقت رجل حلاليفف من كتر اللف على الشغل

سيدي الرئيس اننى أطالب

• بإلغاء نظام الوسطه والكوسة في مصر وموضوع الأولوية لأبناء العاملين دي حاجه وسخه بالصراحة
  
  
• او باعدام جميع النساء عندنا لان ملهاش لزمه الخيله الكدابه اللى احنا فيها دى هنعد نتفرج عليهم من بعيد بس لحد امتى
  
  
• سيدي الرئيس اللي يتكسف من بت عمه ميجبش منها عيال ومن الأخر كده يا تشغلني يا تعدم الحريم يا تصرحوا ببيوت الدعارة
  ومش كده وبس لا وتجهزوا الشوارع كمان بأحدث الأجهزة اللي تساعدنا على التحرش الجنسي ومحدش يلومني بقى
  
  
  
• سيدي الرئيس أنا بقالي ثلاثة عشر عاما من ساعة ما تخرجت ومن قبلها ب أربع سنين وأنا بحلم انى أتعين معيد في الجامعة خصوصا إن تقديري العام امتياز وعشان كده بس انا كتبت لحضرتك جواب وكنت هبعته لحضرتك اشرح لك فيه مدى الظلم الواقع عليا واني نفسي أبقى معيد ولاننى معرفش عنوانك فقد ذهبت لقسم الشرطه فى بلدنا قولت اسألهم عليه وأكيد هيبقوا عارفينه بس من يومها وأنا الحمد لله راضي بحالي و مليش غير طلب واحد حقيقى أتمناه ياريت حضرتك لو تعرف حد في شركه كوكاكولا تخليهم يلغوا تصنيع حجم الصاروخ لأنه كبير آوى ومتعب جدا وسيادة ظابط المباحث عندنا معندوش يا أما ارحميني وزيادة في الأمان وحرصا على سلامه المواطنين الغلابة يبقى كتر خيرك لو خلتهم يلغوا الازاير خالص ويعبوها في كياس
  
  

وختاما سيدي الرئيس لك منى ألف سلامه

توقيع المغفور له / المصري صابر راضى حليم عبد الملك

جوابات صابرة السيد عبد الصبور 1

بسم الله الرحمن الرحيم

السيد المحترم / رئيس جمهورية مصر العربيه

بعد التحيه,

انا الفتاه المصريه / صابره السيد عبد الصبور

اكتب لسيادتك هذا الخطاب لتقول لى ماذا افعل سيدي الرئيس والاب الحنون بالله عليك ياشيخ قولى ماذا افعل وانا فتاه ابلغ من العمر اثنان وارعين سنه ولم اتزوج حتى الان بسبب اضطهاد جميع الرجال لي , بزمتك يصح كده انهم يقولوا عليا فقر ووشى يقطع الخميره من البيت
مع انى زيى زي اى بنت مصريه ولو كان يعنى على جهاز التقويم اللى مركباه فى سناني ايه يعنى منا هشيله من اول شهر سبعه

سيدى الرئيس انا اطالب

• باعدام جميع الرجاله لانهم زي قلتهم وبصراحه كده قلتهم احسن كمان
• او اجبارهم على الزواج منى

وذلك فى خلال تسعة ايام من تاريخه مع العلم اننى لا اعمل ولا امتلك اى شئ

• ملحوظه حتى لا اكون كدابه يا سيادة الريس انا امتلك جزمه من النوع الكاوتشي

مع السلامه يا سيادة الريس وانا هنتظر ردك

توقيع البومه / صابره السيد عبد الصبور