امبارح بليل قبل وانا هموت وانام عرفت بالظبط ليه اصحابى بيقولولي انى عامل دماغ طبيعى وعذرتهم اوى لما لقيت نفسى بفكر فى حجات غريبه
خد عندك مثلا انا فكنت بقول لنفسى بما ان التزاوج والتكاثر ده اوبشن option موجود فى كل الكائنات على كوكب الارض انسان وحيوان وحشرات ونباتات فقولت بما ان فى تزاوج وحركات بقى وقله ادب وكده برده فى النباتات هل ممكن نلاقى بين الزهور زهره مش بتاعه جواز وخلفه ومسئولية وكده مثلا ونلاقيها بتحب العملية دى وخلاص ؟
- لو فى كده يبقى ممكن نلاقى مجموعه زهرات انثى مكونين شبكه لممارسة الرزيله ؟
- ويكون مثلا بيقودها زهرة راجل او ونلاقى زهره سمعتها فى الارض وانها محترفه بغاء بقى ورمرامه وبتقبل اى لقاح من اى زهره راجل
الاسئله اللى فاتت خلتنى افكر فى شويه اساله اصعب زى مثلا
- لو زهرتين زهره راجل وزهره ست غلطوا مع بعض ولقحوا بعض فى الحرام ايه اللى هيحصل عقابهم هيكون ايه؟
- وهل هى هتصارح الزهرة الدكر اللى جى تلقحها من الباب فى الحلال فى موسم التزاوج ولا هتغشه وتروح تعمل عمليه ترقيع متاع ( عضو التانيث فى الزهره ) جديد وتضحك عليه ؟ زى اللى بيحصل عندنا احنا البشرو شيخ الازهر محلله
- طيب بالنسبه للزهور الخنثى ايه سمعتها وسط الازهار التانيه وبيعملوا مظاهرات وكده برده وجمعيه حقوق الازهار بتكلم عنهم وهل عبد ربه شغال معاهم برده وهل الزهور الخنثى دى برده بيبقى ادريس لعب معاهم وهما صغيرين ولا ايه النظام؟
- بس اقولكوا حاجه بصراحه اكتر سؤال كان محيرنى اوى هو فى زهور مزز وزهور تعبانه ؟ يعنى ممكن زهر راجل يشوف زهره ست معديه يميل على صحبه ويقول اوووف عليها متاع او متك جامده
- هو فى زهره مطلقه ؟
- طيب هو لو انا قطعت زهره راجل الزهره الست اللى متلقحه منها تبقى ارمله؟
- طيب هل الخروب جامد فى التكاثر ( عشان زنجى يعنى ) ولا ايه النظام هناك ؟
- طيب بلاش كده هل هنلاقى زهر راجل يكون زئب زهرى ويغتصب زهرة بغير رضاه تحت تهديد الشوك مثلا ؟
- وهل لو اغتصبت زهرة بغير رضاها هنلاقى الزهرة دى بطنها كبرت وشكلها باين وبقية الزهور يقعدوا ينتقدوها فى الريحه والجيه وكأن ده زنبها هى؟
- قعدت كتير افكر هو ممكن زهره تتحرش بزهره فى قلب الجنينه كده وتجرى ؟
- طيب والزهور الباقيه هتاخدهم الشهامه ويدافعوا عنها ولا الشهامه قلت وقربت تختفى زى عندنا احنا البشر؟
بعد كل الاساله دى اتاكدت من حاجه غريبه ان مش بس الزهور لا ده الزهور الحيوانات كمان متلاقيش عندهم حيوان بيغتصب حيوانه او مجموعه كلاب يطلعوا يجروا على كلبه ويشدوها من ديلها ويجروا وخدينلى بالكوا حتى الكلاب مبييعملوش كده انما احنا اللى المفروض اسمنا بشر وعندنا عقل وحضاره ودين وحجات كتير المفروض تمنعنا اننا نعمل كده فى كتير مننا بيعمل
- فاعذرونى لما اقول للناس دى انتوا حتى محصلتوش الكلاب
تصبحوا على خير بقى
ليست هناك تعليقات:
إرسال تعليق